काठमाडौं, ९ साउन । सौर्य एयरलाइन्स जहाजसँगै सदाका लागि अस्ताए एकै घरका तिन सुखी परिवार । भविष्यमा ठुलो काम गर्ने आसाका साथ आफ्ना आमाबुवासँग अगाडि बढेका ती साना बालकको सपनाहरू सौर्य एयरलाइन्स जहाज मै सेलाएर गएको छ । बुधबार पोखराका लागि उडेपछि दुर्घटनामा परेको जहाजमा एकै परिवारका तीन जनाले ज्यान गुमाएको परेको हो । यसरी ज्यान गुमाउनेमा सौर्य एयरलाइन्सका प्राविधिक मनुराज शर्मा, उनकी श्रीमती प्रिजा खतिवडा र ४ वर्षीय छोरा अधिराज शर्मा रहेका छन् । प्रिजा ऊर्जा जलस्रोत तथा सिँचाइ मन्त्रालयमा सहायक कम्प्युटर अपरेटर थिइन् । बुधबार इन्जिन परीक्षणका लागि पोखरा अन्तर्राष्ट्रिय विमानस्थलको ह्यांगर प्रयोग गर्ने गरी विमान उडेको थियो । तर विमान उडे लगत्तै विमानस्थल क्षेत्रभित्रै दुर्घटनामा परेको थियो । पोखरा उडेको सो विमानमा ऊर्जा मन्त्रालयकी कर्मचारी खतिवडा र उनको नाबालक छोरा समेत परेको सूचना प्राप्त भएको प्रवक्ता नवीनराज सिंहले जानकारी दिएका हुन् । सौर्य एयरलाइन्सले विवरणमा खतिवडा र उनका छोरालाई पनि कम्पनीकै कर्मचारीको रुपमा देखाए पनि उनीहरू यात्रु रहेको खुलेको छ । नागरिक उड्डयन प्राधिकरणले विमान दुर्घटनामा परी बालक अधिराज शर्माको मृत्यु भएको पुष्टि गरेको छ ।
